الأسرار المعروفة

الخميس، أكتوبر ٠٥، ٢٠٠٦

و من الحنين ما قتل... insomnia









أنا دلوقت فى انسومنيا... مكانى المفضل ... فى 26 يوليو فى الزمالك.... و اللى عرفت النهارده انه حايقفل...و ان ده آخر يوم فى المكان.. مكان عادى...مافيهوش أى حاجه مميزه غيرنا... احنا... الصحاب اللى اختاروا يبقوا عيله أو العيله اللى لقت بعضها فجأة و بدون مقدمات... و ده حصل تقريبا فى نفس الوقت اللى فتح فيه المكان من 3 سنين... و بقى المكان اللى دايما بنتجمع فيه أو بنروحه لما ما يبقاش عندنا مكان... 2 الضهر.. 4 الفجر.... أى وقت....المكان مفتوح 24 ساعه..و ناسه ظريفه... كرم غريب... و أدب ما فيش بعد كده...مكاننا...والله مكاننا.... انا حبيت فى المكان ده... و كرهت و بكيت و ضحكت لما قلبى كان حايقف.... انا قعدت هنا مع اصحابى...حبايبى...و كمان ناس غريبه عرفتهم هنا...ده انا حتى كتبت فيلم هنا...3 سنين...أحلى سنين عمرى...العنفوان و الغضب والحب المجنون و الكراهية المفرطة....كل دول كانوا علاماتنا على حيطان المكان.....أحلى بنت شفتها فى حياتى كانت قاعده هنا.... و أثقل واحد كان هناك....غنيت و صرخت و اتجننت هنا.... حاسس ان حته مهمه من حياتى بتقع و ما اظنش حاعرف أرجعها تانى....لو الواحد يقدر يمسك الذكريات و يحتفظ بيها فى صندوق و لما يحتاجها يقدر يصحيها؟؟؟ بس للأسف مستحيل... هل فى يوم من الأيام حاقدر أعمل فيلم فيه ريحة المكان؟؟؟؟ فعلا ماعرفش....حته منى بتقع.... قدام عينى و مش قادر أحبس دموعى....و مش قادر أخطف المكان اللى باحبه... و طبعا مش حايفضل لنا غير الصور الثابته اللى ما لهاش ريحه غير ريحة البلاستيك..اللى بتقتل الروح... و بتقتلنى

هناك تعليقان (٢):

saso يقول...

:(
حصللي كدة مع كامب كافية... لما كان بيتصور فيه ومقفول علشان خاطر التصوير كنت غيرانه عاوزة مكاني والناس اللي اتعودت عليهم .. والمذاكره اللي ذاكرتها هناك وصحابي اللي مش بيحلوا ولا ضحكهم بيعلي غير فيه
ازاي بنرتبط بمكان اوي كده ونتكلم عنه كانه انسان
لما بامسك صور صحابي باسلم علي الصوفا.. وعلي المجلات والصور كانهم ناس

أدهم الصفتى يقول...

ساسو... الأماكن فعلا ناس.. أو بنحسها زى الناس... الأماكن ناس... و الحاجات كمان... و انا صغير قوى... 6 سنين مثلا.. كان عندى قلم بحبه قوى... كنت بغطيه بالليل فى الشتا عشان ما يبردش.. و كنت باقول له صباح الخير... و تصبح على خير... و لما فضى و اكتشفت انه ما ينفعش يتملى.. عيطت.. اكتئبت ييجى شهر
الأماكن ناس يا عزيزتى
والحاجات كمان
والله